فصل 17
نهال-(لحقت عليها وكاتنهش ) ماغاديش تهربي مني دابا
طلقت من نورسين فاش شافتو وتوجهت لعندو بينما هوا كان كالس على السرير وكايراقب حركاتها ...ركعت امامو وعنقت وجهو بيديها بجوج وقالت بصوت خافت
نهال- واش عرفتي شحال كنت خايفا عليك فاش قالولي مريض..واش نتا بيخير دابا
حست نورسين بان وجودها لا داعي منو خرجت وسدت الباب موراها وبالحضة ضارت باش تنزل فالدروج وطلاقات مع صدر شخص مباشرة هزت راسها باش تشوف شكون وكان عمر كان كايشوف فيها بدهشة ولي شافو مكانش خصو يشوفو ...
عمر-مافهمتش...يعني لي شفت دابا مكاينطابقش على شي لي قالت الانسة نورسين
نورسين- هاه نننورسين
عمر- شكون نتي بالضبط
نورسين(بارتباك) شنو كاتقصد مافهمتش
عمر- واش كاتعرفي شي بنت سميتها نورسين
نورسين- لا
عمر-هي نفسها البنت لي لداخل
نورسين- اشنوووو
عمر- واش كاتعرفك
نورسين- لا
عمر- قالت بانها صديقة اسد...شوفي فيا ماتجرئيش وتكدبي
نورسين- هي كانت خايفا عليه ...وفاالنهاية هي صديقتو ولي شفتي دابا ماشي شي حاجة
قدرت تقنعو واخا مادخلتليهش هاد الفكرة لدماغو لاكن مشا بحالو
نورسين- هاديك لموصيبا خدات سميتي بصفتها صديقتو باش تقدر تدخل وتخرج لهاد الدار كيف بغات..دكية مع راسها ...حتى عمر ولا شاك فيا اووف...
__________________
في الزنزانة
جات خطيبتو الحقيقية وخليتهم يتكلمو على خاطرهم وخرجت ماعرفتش داك الاحساس لي حسيتو كان خايب ماعرفتش علاش واش حيت غادي ضيعلي خدمتي ولا ماعرفتش علاش صراحتا رجعت لبيتي لبست حوايجي هزيت صاكي وتلفوني وخرجت وماشافني حتى شي واحد كلست فالزنقة على واحد الدرجة كانفكر فشي طريقة لي تخليني نوصل لشي حاجة تقدر تتبت عليه انه فعلا منتمي لديك المنضمة لدالك فكرت نمشي للشركة ونقتاحم مكتبو ونقلب على شي دليل وقفت بحماس لاكن بسرعة رجعت كلست فمكاني و فكرت فنفس الوقت ان انتمائو للمنضمة مغايكونش بالوراق ولا لميلفات خصني شي دليل ملموس يعني خصني نولي نحضيه ونتبعو فينما مشا
ضربت رجلي مع واحد لقرعة كانت فالارض حتى طيرتها وجات فواحد الراجل مسكين وعتادرت منو فكرت ان هاديك الزعرة رجعت لحياتو من جديد خلاتني نتعصب حيت بسبابها غادي ضيعلي خدمتي فكرت وفكرت وفكرت ومالقيت حتى شي حل وقلت نخلي الاجواء تتهدن ومن بعد نفكر فشي طريقة
ماكنتش باغيا نرجع للدار داك نهار كلست شي 5دقايق وانا دايرا راسي بين يديا وكانفكر انني عايشا حياتي بدون اهداف ممتلكاتي فيد الغريب وانا كانحاول نغوي شاب باش طيح فشباكي اشمن نوع حياة هادي ...فلحضة فكرت انني ضيعت 3سنين من حياتي غير فتخربيق كان يحسابلي غادي يكلفوني بمهمة بايخا بحال هادي كاع مانضيعش وقتي لاكن فنفس الوقت قلت انني خديت فكرة وعشت بزاف ديال التجارب لي ماكنتش غادي نعيشهم كون بقيت خدامة سكرطيرة عند هداك المتملك بلعكس كان غير غادي يتقوى ويتجبر عليا اكتر اصلا هيوايتو هي احتقار الناس ...
بدون تفكيرم ولا اراديا وقفت وشديت اول طاكسي بان ليا للمنطقة صيناعية ففاس بعد 20 دقيقة نزلني طاكسي وقفت كانشوف فداك المبنى العملاق لي كان خاصو يكون ديالي فالحقيقة ...قلبي عمر بالحقد بركت حلى سناني حتى سمعتهوم كايطاحنو تنهدت بعمق وتقدمت لباب الشركة بغيت ندخل لاكن الحارس وقفني
الحارس-شكون نتي وعندمن جاية
نورسين-(شافت فيه بشر)ماغاديش نتشاور معاك باش ندخل لشركتي
الحارس-(ضحك بسخرية) ههههههه شركتك ههههه وشكون نتي بالسلامة
نورسين- وشكون نتا باش تسولني شكون انا
الحارس-انا الحارس ديال هاد الشركة
نورسين- عندك شي ورقة كاتبت انك الحارس هنا
الحارس-هاه اااااا احم انااااا
نورسين-(بصراخ) حيد من طريقي
شافني سي ((قاسم)) (سبقلي دكرتو ففصل شئ من الماضي ) لي كان اليد اليد اليمنى لبابا الله يرحمو كان خارج لاكن ستوقفو صوت صراخي على داك العساس وجا لعندي كايجري
قاسم-بنتي نورسين كبرتي تبارك الله ...فين كنتي غابرة هاد المدة كاملة شحال قلبت عليك ختافيتي تقول نشقات الارض وبلعاتك حرام عليك ابنتي بقات فقلبي وصيت باك الله يرحمو وصاني نتهلا فيك ونرد بالي عليك لاكن انا ماكنتش قد المسؤلية كانعتادر
حيدت انضاري شريرة على داك العساس وتقلب 120 درجة فاش شفت فسي قاسم بتاسمت ليه ابتسامة لطيفة كولها كدب لاكن فقلبي حقد كبير عليهم واخا هوا لي عاوني باش نقدت الشركة من الافلاس لاكن احتمال كبير يكون عندو يد فلي وقاعليا ولواليديا حتى هوا حطيتو فالقائمة بعد بنت عمي (سماح ) راقبت انضارو لحنينة تبدل وشرف وشعرو بياض لاكن كلامو المنمق ماتبدلتش بادلتو نفس الابتسامة الزائفة
نورسين- عمي قاسم لباس عليك
قاسم-انا لاباس ابنتي تفضلي دخلي ختك سماح فالمكتب ديالها غادي تفرح فاش تشوفك(قاطعو لعساس)
العساس- واش نتي اخت لالة سماح....هااالعار اختي الى ماسمحيلي
نورسين-(بشر)شوف فيا مزياااان وعقل على هاد لوجه حيت غادي تولي تشوفو بزاااف
العساس-(بارتباك) اااام مرحبا بيك الالة كانتمنى تسمحيلي ماكنتش عارفك
خليتهم كايتغامزو وزدت قدامهم بكل ثقة فالنفس وكان داك شارف ديال قاسم تابعني بحال شي كلب كاينبح مورايا وقفت كانشوف فارجاء الشركة زيانت وتغيرة فيها شحال من حاجة الموضفين غادين جاين بعجلة وكل واحد حاني راسو على شغالو كولشي غادي على احسن مايرام ضرت عند سي قاسم
نورسين- فين هوا المكتب ديالها
قاسم-(بارتباك ويديه عرقانين ) ااه تفضلي تفضلي معايا من هنا
السيد ولا فازك بلعرق ويضور ويمسح فجبهتو لاكن انا هاديك الثقة فالنفس ماعرفتش منين تسلطة عليا تمشيت بخطى ثابتة نحو مكتب سماح وقفت سكرطيرة باش تسولني فين غادية لاكني ماعرتهاش اهتمام ودخلت وخليتها كاتغوت مورايا بالصدفة كان داك نهار عندها اجتماع دخلت وغير شفتها طغات على وجهي ابتسامة كولها مكر اما هي غير شافتني وقفت وتعمقت فالنضر ليا بعض اللحضات وعاد طلعت معاها وعرفتني شكون المسكينة تسعقات وبدات غير كاتمتم بكلام مامفهومش وطلبت من الناس لي كانو فالاجتماع المغادرة لاكني وقفتهم وماخليتهمش يخرجو
نورسين- ممكن تبقاو معانا واحد الخمسة ديال دقايق بغيت نوضح شي امور مهمة
سماح(بصراخ) فين هوما رجال الامن خرجو عليا هادي من هنااااااا
خرجات السكرطيرة تعيط لرجال الامن لاكن انا بسرعة سديت الباب ودوزت لقفل وطلبت منهم كاملين يكلسو ويرتاحو
نورسين-(شفت فيها بتحدي) علاش الامن واش ماتوحشتيش بنت عمك لعزيزا... انا ماجيتش ندير صداع ابنت عمي سمااااح...انا جيت نبلغك رسالة وبما انكي جمعتي موصفينك حتى هوما يسمعوني شنو بغيت نقول
قاسم-(بتوتر) هادو ماشي موضفين هادو اعضاء شركات تانين امدموزيل نورسين
نورسين- (بتاسمت بمكر)مزيااااان بما انكم رئساء على مجموعة من الشركات غادي نعطيكم نصيحة ولي هي عرفو معامن كاتعاملو هاد سيدا لي حداكم هي بنت عمي وانا هي بنت الحاج المالكي الله يرحمو يعني الوريثة الشرعية لمجموعة شركاتو
تهافتو اصوات الرجال الاعمال ومافاهمين والو سماح بدات كاتمتم وتتنفس بسرعة تسلطت عليها بحال شي كابوس فوسط نهار ...صافي جاء الوقت باش غادي نوقفها عند حدها حتى سمعت واحد من الرجال قالي
الشخص- تبارك الله كبرتي ابنتي اخر مرا شفتك كونتي مازالة صغيرة سبحان لي خلقك كاتشبهي لباباك الله يرحمو كونا انا وياه صحاب بزاف وكنت كانجي عندكم لدار واش ماعقلتيش عليا
نورسين-(بتاسمة بهدوء) لا اسيدي ماعقلتش كيف قولتي انا كونت مازالة صغيرة...بما انني رجعت بنت عمي مع الاسف جا الوقت باش ترتاحي سمعت انكي مازال ماتزوجتيش هانتي جاتك الفرصة حتى لبين يديك سيري قلبي على حياتك وتزوجي اولدي وربي ولادك فراحتك انا غادي نتولى امور الشركة
سماح-(جمعت معاها بسقلة) خرجي عليا من هناااا نتي ماعندكش الحق فهاد فشركة حيت هي شركتي بوحدي
ماستحملتش ديك الصفعة لقوية لي عطاتنى سماح وشديتها من وجهها بقوة ولسقاتها مع لحيط ناضو الرجال باغين يفكو لاكني وقفتهم بصراخي وطلبت منهم حتى شي واحد مايقربلي
نورسين-(همست فودنيها بصوت خافت) سمعيني شنو غادي نقولك من هاد نهار عتابريني الكابوس لي غادي يرافق احلامك الوردية ابنت عمي زوينة حيت كبرت وكبر معايا حقد فقلبي عليك وكانواعدك غادي نعرف شكون كان السبب فموت وليديا وغادي ننتقام منك على كااع هاد السنوات لي عشت فيهم محروما من ريحت وليديا
سماح-(بصوت خافت) بلاماديريلناش شوهة خلينا نفاهمو غير بلعقل وطلقي مني راك المتيني
نورسين-(زيرت قبضتها) مازال مادقتي والو فالالم ابنت عمي
سماح-سيري بحالك بلا شوهة انورسين
نورسين-غادي نمشي ولاكن غادي نرجعلك وكانواعدك غادي نردليك الصفعة لي صفعتيني قدام الجميع لاكن الصفعة ديالي غادي تكون اقوى ماتنسايش ان الشركة على حااافت الافلاس خودي حدرك مني(دفعاتها بقوة مع لحيط وطلقت منها وشافت فالحضور وبتاسمت) كانعتادر على الازعاج تقدرو تكملو خدمتكم بسلامة عليكم
خرجت وانا على وجهي ابتسامة نصر وداك قاسم تابعني وكايتبحلس عليا انا عارفاه مزيان وعارفا علاش كايدير هاكا لانه من النوع لي كايجي غير فصف القوي وكيف كانعرف نحصد اعدائي كانعرف نحصد شركائي هوا الورقة الرابحة فيدي وعارف جمييع المعلومات على الشركة وغادي نستغلو مزيااان بتاسمت ليه ابتسامة لطيفة اودعتو وخرجت شفت فداك العساس بمكر وخليتو كايترعد وزدت وانا كانضحااااك وفرحانة بهاد الانجاز لي قمت بيه ...وقفت فالباب كانفكر وتلاشات فرحتي وضحكتي وقلت اشنو كانخربق شنو درت كانهدد فيها وكانواعدها نجري عليها ولاكن كيفاش ماعنديش اوراق ضدها وماعندي فلوس لي تمكني ندير شي حاجة او نتقدم شي خطوة للامام اووف كانعرف غير نحل فمي بلا فايدااا قاطعت افكاري يد جرتني وسحبتني عندها مور واحد الحيط حتى رتاطمت بصدر داك الشخص طويل عليت عيني وكان هوا صاحب العيون الرمادية رتابكت وماعرفتش شنو غادي ندير
ياسر- شنو هادشي لي درتي
نورسين-شنو درت
ياسر- كونتي كاتهددي بنت عمك قدام الجميع مكانش عليك تتصرفي هاكا كان عليك تهضري معاها فمكان مغلق وبينك وبينها
نورسين-(بارتباك) وااش حتى نتا كونتي فالاجتماع
ياسر- اه حتى انا وعندك زهر اسد مريض وماحضرش حتى هوا
نورسين- اوووف وشنو بغيتيني ندير اياسر عيت مانصبر والله (تعمرو عينيها بدموع)
ياسر-(عنقها) صافي ماتبكيش مكانبغيش نشوف دموعك..قوليلي عاودتي لاسد على حياتك وشكون نتي
نورسين- لا ومستحيل عنداك تقولو شي حاجة عافاك كانترجاك خلي هادشي لي شفتيه غير بيناتنا مابقا والو ويكمل شهر ونمشي بحالي مايعرفني مانعرفو انا غادي نرجع شركتي باي طريقة كاننت وغادي نشوف واش غادي يبقا يعيطلي الفقيرة فاش غادي نبدا نافسو فالسوق
ياسر-الفقر ماشي عيب انورسين العيب هي يكون قلبك فقير ...يكون مفتاقر لشي حاجة سميتها الانسانية
نورسين- وكيفاش بغيتيني نرجع حقي هاه نتسنى قلبي حتى يعمر بالانسانية...ياسر انا غادي نمشي بحالي تعطلت وراك عارف داك صاحبك كيف داير يالاه بسلاما
ياسر- ماتصرعيش وماتهوريش باش ماتندميش
خليتو وزدت ماعرفتش علاش ماديتهاش فهضرتو واخا كانت على حق تمشيت لبضعة امتار ولاحضت ان سيارة كحلة تابعاني مابغيتش نعيق واول حاجة درتها جبدت تلفوني من صاك وتاصلت بعابد
نورسين-(كاتمشى بخطوات زربانين) وييي سي عابد
عابد-لاباس عليك ابنتي
نورسين- خليك مني انا دابا ...قولي واش نتا لي سيفطتي سيارة كحلة من نوع مرسدس تتبعني
عابد- اشنو لا لا ماشي انا حفضي رقمها شوفي كيف ديري تتخطايها اجي لدار استفانيا عنداك تجي للمقر وهوما تابعينك
(لي كان تابعها هوا عصام سكرطير اسد كايجمع عليها معلومات)
نورسين-اوكي شاف
ضرت شفت فسيارة وسجلت الرقم فدماغي وكملت طريقي بسرعة لاكن السيارة مازالة مراقبانى ماعرفتش شكون لي كان فيها لاكن الخوف بدا يتملكني ومن خطوات زربانين لجرا باقسى سرعة عندي لاكن السيارة مازالة تابعاني ضطريت ندخل فدروبا ضيقين باش نتلفو والحمد لله نجحت بقيت مراقبا السيارة لي كانت واقفا وحتى مشات وعاد خرجت وشديت طاكسي لدار ستيفانيا غير وصلت ضقيت عليها فتحتلي الباب
نورسين- ستيفانيا فينهوا عابد
ستيفانيا - وعليكم السلام
نورسين- (تنهدت بتعب) سمحيلي اختي لاكن انا راه معصبا شوية
ستيفانيا- مزيان
لاحضت الارتباك على وجه ستيفانيا عادتا هي انسانة مرحة وضحوكية لاكن هاد المرة ملامحها كانو باردين وحتى هضرتها لاحضت انها كانت مخبية شي وراق مور ضهرها سولتها لاكن تهربت ومابغاتش تجاوبني خليتها على خاطرها ودخلت للصالة كلست على الكنبة لاكني حسيت انني كلست على شي حاجة نضت وكانت ورقا هزيتها وانا كانقراها ماحسيتش بستيفانيا حتى غوتت عليا وخطفتهالي من يدي
ستيفانيا-شكون عطاك لحق تقيسيلي فاغراضي
نورسين- ستيفانيا تهدني مالكي معصبة
ستيفانيا- سمحيلي اختي لاكن عندي شي مشاكل هدا لاش معصبة
نورسين- امم هاد المشاكل متعلقة بالاسماء لي فديك الورقة
ستيفانيا- دغيا قدرتي تقرايهم
نورسين- فالورقة مدكور اسماه مشتبهين فيهم فقضية احتراق منزل فوسط الغابة ستيفانيا واش كاديري شي حاجة بلا خبار عابد
ستيفانيا- لا لا ماشي هاكاك
نورسين- صافي مزيان منين غادي يجي غادي نقوليه على الورقة وقضية دار ديال الغابة حتى هي
ستيفانيا- (بارتباك)عنداك ماغاديش تقوليهالو ياك
نورسين- ادن عاوديلي شنو قضية هاد الاسماء
ستيفانيا-(بارتباك) اناااا فاش كان عندي 10 سنين فواحد نهار كونا غير انا وبابا لي عايشين فديك دار حيت ماما كانت ميتا مسكينا... فداك نهار الاسود بابا جرني لواحد لبيت وسد علينا وجرني عندو وعنقني وهوا كايقطر بلعرق ومتوتر وباينا عليه انه خايف من شي حاجة ...فواحد لحضا سمعنا دقان فالباب بجهد وكانو اصوات ديال شي رجال بغيت نخرج نحل لباب لا كن ماخلانيش وجرني عنقني وكايبكي كنت كانسولو باش نعرف علاش ومناش خايف كان فواحد الحالة خايبة تزايدو اصوات دوك رجال ...كنت خايفا بزااااف خلاني بابا وخرج بغيت نخرج معاه لاكنو منعني وسد عليا سمعت اصوات وصراخ دام لمدة طويلة وفلحضة شفت دخان داخل من تحت الباب بقيت كانغوت ونعيط لبابا باش يعتقني لاكن بدون فايدا بقيت على ديك الحال كانبكي ونغوت حتى اغمى عليا بسبب الدخان ومابقيت عقلة على حتى حاجة حتى حليت عيني فطبيب واول ماشفت قبالتي هوا سي عابد وهوا لي كان متكلف بالقضية ديال بابا الله يرحمو
نورسين- وتقبط المجرم لي حرق ليكم دار...
ستيفانيا- شدو واحد كان مشتبه بيه لاكن رجعو طلقوه فاش تئكدو انه برئ... من بعد الحادث لي وقاع تكلفت بيا خالتي جات للمغرب وداتني لبريطانيا وكنت ديما على اتصال بسي عابد وكنت كانسولو على قضية بابا ...كبرت اوليت قد مسؤلية نفسي خديت الورت ديال ماما الله يرحمها حيت هي كانت من عائلة غنية شوية خديت لفلوس وهبطت للمغرب واول واحد مشيت عندو هوا عابد مسكين ستقبلني فدارو وكلست معاهم واحد المدة وكان كايحسبني وحدا من بناتو بعد مدة ستقريت وشريت هاد الدار لي كاتشوفي ..
نورسين-(تنهدت)فهمت حتى نتي تعدبتي فحياتك
ستيفانيا- بزااف والله تعدبت بزااف صوت صراخ دوك رجال مازال كانسمعو فودني بحال يالاه لبارح...
نورسين-دابا نتي باغيا تنتاقمي لباباك..
ستيفانيا- كنت باغيا ننتاقم لاكن هادي 3سنين وانا كانحقق فهاد القضية وكتاشفت ان بابا مكانش داك الانسان البرئ كيف كان يحسابني
نورسين-مافهمتش علاش
ستيفاتيا- فهاد لوراق المشتبهين فيهم كلهم عندهم صوابق عدلية الا شخص واحد وقلت مستحيل هدا تكون عندو شي علاقة بقتل بابا ...لاكن كان ضاروري نرجع ونحقق معاه وطلاقيتو وكان واحد الراجل كبير فالسن وهوا لي عاودلي الحقيقة ...وقالي بلي بابا كان كايخدم فالاشياء الغير القانونية بحال لمخدرات ولقرقوبي كان متورط مع شي عصابة وكان كاينفدلهم كاع لي كايطلو منو قتل وسرق ودار شحال من حاجة خايبة ... كان قتل اب ديال شي عائلة غنية وكانو عائلت الضحية كايقلبو عليه باش ينتاقمو لباهوم بابا كان خايف منهم عليها خرجنا نسكنو فدار الغابة بقينا شي شهراين فديك الدار حتى جا نهار لي وقاعة فيه الواقعة كان يحسابلي بلي بابا مضلوم وكانت كانشوفو بحال شي ملاك وقدوتي فالحياة طبيعي حيت انا بنتو لاكن فاش عرفت كاع هاد لمعلومات تراجعت وحيدت فكرة الانتقام من دماغي حيت هوا تلقى عقابو على افعالو ...(نزلت الدمعة من عينيها)
نورسين-(شدت ليها فيديها) ماتبكيش اختي مزيان منين عرفتي الحقيقة قبل ماتتهوري وديري شي حاجة لي تندمي عليها...
ستيفانيا-داكشي لي كاين... عافاك ماتقوليش هادشي لسي عابد حيت غادي يتقلق مني بزااف لانه كتاشفت بلي كان عارف هادشي كامل ومخبع عليا حيت مابغانيش نعرف هادشي على بابا باش مايطيحليش من عيني ...
نورسين-اكيد ماغاديش نقولهالو غير رتاحي نتي احبيبة واخا ...(سمعت دقان فالباب) يالاه مسحي دموعك ونوضي احبيبتي حلي لباب غايكون عابد لي وصل ....
ناضت حلت الباب وكان عابد معاه بويكا وركان ... دخلو وتسالمو
نورسين-(مدتليه ورقا)شاف هادا هوا رقم السيارة لي كانت تابعاني...
عابد-(شد من عندها) شنو كنتي كاديري فديك المنطقة
نورسين-هاه...اااام
عابد-مكاين لاش تفتفي وصلني خبارك....
نورسين-اناااا
عابد-(قاطعها بصرااخ) واش حماقيتيييي كيفاش قدرتي ديري حاجة بحال هادي
نورسين-واش بغيتيني نسمح فحقي اشاف
عابد- ماشي هكاك الغبية واش نسيتي راسك فمهمة وخصك تنفديها بهاد الطريقة غادي تولي متبوعة يحسابلك بنت عمك غادي تفلتلك شوهة لي درتيلها ليوم
نورسين-لي فجهدها ديرو مكانخافش منها
بويكا-صافي صافي بدلو علينا هاد الموضوع
دوزو ديك لعشية مع بعضهم ضحكو شوية ولعبو ليجو ديال لكورا مرا لبنات ومرا دراري ومرا كانو كايتخالفو بنت اولد دوزت ديك ليلة مزيانة تغدات معاهم وخرجو هي وستيفانيا تقضاو بعض الملابس والاحدية وتساراو فلمدينة وكلسو فلمقهى ورجعو للدار فلعشية وخلط عليهم بويكا وريان لي كان مواعدهم بشواء جاب معاه لكفتا وسوسيس ...
______________
ركان-نورسين يالاه نطلعو لسطح شوية
نورسين-ااه واخا يالاه ...
طلعو لسطح اوقفو كايتمنضرو فاضواء المدينة الرائعة...
ركان-كيف جرا هاد نهار مامشيتيش لدار هداك لي سميتو أسد...ماخفتيهش يتقلق عليك
نورسين-(شافت فيه بسخرية) دابا راه عندو معامن يتلهى مكانضنش غادي يكون عندو الوقت باش يفكر فيا واش عايشا ولا ميتا...
ركان-شوفي فيا ...عنداك تكونيي
نورسين-اشنو غادي نكون
ركان-كاتحسي من جيهتو بشي حاجة ...
نورسين- اه كانحس بالكره من جيهتو...
ركان-عليها فاش رجعات خطيبتو لحقيقية طلعلك دم وهربتي...
نورسين-اش جاب شي لشي انا خرجت حيت كونت باغية نشم شوية دلهوا ومنها تواجهت مع ديك بنت عمي...يعني وقتي عامر بزااف مامسالياش نفكر فيه لاهوا ولا خطيبتو ...
ستيفانيا-(طلعت هي وبويكا) هاحنا تبعناكوم ...
نورسين-مرحبا هاد ليلة الجو زوين نجوم كايلمعو فسماء تبارك الله...
بويكا-نورسين مشا لحال واش ماغاديش ترجعي لدار أسد...
نورسين-مالكوم هاد نهار كاتهضرولي غير عليه انا ماشي العبدة ديالو هوا عندو حياتو وحتى انا وزايدون هوا مامساليش حيت رجعات خطيبتو لحقيقة هاد نهار يعني هوا ماغاديش يكون كايفكر فيا اصلا....
ستيفانيا- نوورسين شوفي فيا...ازغبية وليتي كاتبغيه...
نورسين-انا ههههههه لا مستحييل....
ستيفانيا-ولاكن احبيبة ملامحك كايبينو عكس هضرتك نتي راكي غرتي من خطيبتو الحقيقية ...
نورسين-(بتالعت ريقها بارتباك) هاه ...لا اناا تضايقت حيت رجعات وغادي يكون صعيب عليا نكمل مهمتي ...وزايدون انا كايبانلي غير كاتضيع وقتي معاه مكاينش شي حاجة لي كاتبت عليه انه فعلا منتمي لديك المنضمة اما كون راني عرفت...
ركان-هادوك راهم قتلى محترفين وخدمتهم كاتكون مدروسا ومحبوكا وكايخفيو موراهم جميع الادلة لي تقدر تفضحهم...
نورسين- وباش عرفتيها نتا انا كانقول بلي هوا برئ وماشي ديال هادشي ...هوا صحيح انسان اناني لاكن ماعرفتش كانحس بيه (قاطعها بويكا)
بويكا-كاتحسي بيه ...امم...وكاتقولي مكاتبغيهش ...
نورسين..-سمعوني انا لست...(قاطعوها كاملين)
ستيفانيا/ بويكا /ركان..انا لست حبيبة احد ولا احد حبيبي تركت لكم الهوى وعشقت نفسي...حفضناااااها
نورسين-(ضحكت من كل قلبها) هههههههههههههههه
ستيفانيا- (جراتها لبعيد) اجي نقولك ...
نورسين-اشنو شنو بغيتي...
ستيفانيا-كاينين بزاف ديال الطرق باش تخليه يولي يبغيك...
نورسين-بحالاش
ستيفانيا...متلا تتقربي منو ...اوو تبينيليه بلي مهتما بيه...اوو تخليه معضم الوقت معاك بحال مثلا تنضمي شي رحلة معاه وتستاغلي الفرصة وتقوليليه بلي كاتبغيه
نورسين- ايااااااه اختيي وعلاش ماطبقيش هاد لهضرة مع بويكا حتى هوا يستاحق ..
ستيفانيا-اويلي اش كاتقولي...
نورسين-مكاتلاحضيش اهتمامو بيك ونضراتو ليك
ستيفانيا-اشمن نضرات راه كايقيل يعاير فيا وديما مقاتلا معاه ...
نورسين-شوفي كيفاش كايشوف فيك والله الى هبيلة واحد بحالو ماخصكش تفلتيه ...طيري بيه قبل ماطيرلك بيه شي وحدا وتبقاي تبكي عليا ...
ستيفانيا-(بتاسمت وهي كاتشوفة فيه) حمقى اش كاتقولي...ههههه
****في منزل اسد****
كان اسد كايضور فالجردا بحال لي متلف شي حاجة وكايقلب عليها وتلفونو فيديه وكايصوني ويعاود فتلفون نورسين لاكن كان مطفي...محمد كان مراقبو من غرفتو ومربع يديه تنهد وخرج من الغرفة وهبط عند خوه...
محمد-مازال مارجعت...
أسد-مازال ...سير نتا تنعس مكاين لاش تبفا فايق...
محمد-عنداك تكون وقعتلها شي حاجة ...
أسد-(بتالع ريقو بخوف) لا لا مكانضنش غاتكون مشات لدارهم يمكن توحشاتهم...
محمد-أسد نورسين يتيما وماعندهاش عائلة عندمن غاتمشي
أسد-فوقتاش قالتلك هادشي..(قاطعهم صوت تلفونو صونا) الو..
عصام-مساء لخير سي أسد..سمحلي الى فيقتك فهاد الوقت ولاكن ماقديتش ننعس
أسد-مافهمتش واش كاتحلم بيا ولا كيفاش
عصام-لا ماشي هكاك ...مافهمتينينش ...لي بغيت نقولك بلي هاد صبح فاش كنت فالاجتماع مع سي ياسر اااام ....
أسد-نطق شنو كاين...
عصام-عرفتي انا ماغاديش نهضر غادي نسيفطلك واحد لفيديو فلواتساب شوفو ونتا تفهم...
أسد- اوكي انا غادي نتسناك...(قطع عليه) محمد سير تنعس مشا لحال...
محمد-واخا تصبح على خير...
طلع محمد وبقا اسد بوحدو فاجردا كايتسنا هاد لفيديو لي غايسيفطلو عصام .....2 دقايق اوصلو فتحو وغير شافو تسعق فالاول مافهم والو لاكن عاود لفيديو مرا وجوج وعشرا وماسدقش داكشي لي شاف بعينيه نورسين شانقا على سماح وكاتغوت عليها...