الفصل 1
هي فقط دقيقة لمعضم الناس..ومكايعيروهاش اهتمام ولاكن بالنسبة ليا الامر مختلف...
هاد الدقيقة كانت سبب باش نكره هاد العالم كامل...
كرهت كلشي العالم والبشر لاكن اكتر شئ كرهتو هي نفسي...
كولشي بدا داك نهار فاش سيفطت رسالة لواحد الشخص مكانعرفوش اه نسيت....انا سميتي{نورسين}معنى اسمي ضوء القمر ... اممم ضوووء القمر لي مابقيتش شفتو هادي 6 سنوات انا محكوم عليا بالاعدام وفوسط زنزانتي نحكيلكم حكايتي...
ماغاديش نقولكوم انني من دوك لبنات الرمنسيات والمسكينات والعاطفيات انا مكنتعاملش بالعاطفة لانني تأديت بزاااف من هاد الناحية تجارب وقسوة الحياة هي لي علمتني ان الدنية كلها مصالح ستغلوني وستغلو طيبتي وسداجتي باش يوصلو للي بغاو لاكن فالخر انا لي ضعت ماشي هوما غادي تقولولي ماديرش ماتخافش اكيد نتي درتي شي حاجة لي تستاهلي عليها حكم الاعدام غادي نقولكم قراو وتبعو قصتي الى بنت ليكم ضالمة اذن انا نستاهل نموت بهاد الطريقة ....ماعارفاش راسي واش غادي نقدر نكمل هاد الرواية لان موعد تنفيد الحكم قرب مابغيتش نموت حتى نحكيلكم عن تجربتي طلبو معايا توقع شي معجزة ومانموتش فالخر هههههه كايقولو فاش كاطيح لبقرة كايكترة جناوة
انا فعمري 30 عام ...غادي نرجع بيكم 14 لعام لور فاش كان فعمري 17 لعام....
قبل 14 سنة
كانت كالسا فالحديقة ديال الميتم لي عايشة فيه واشعة الشمس عكست لمعان شعرها الاسود المرفوع ومشدود بشريط احمر موقفة ضهرها مربعة رجليها وحاطة ضهر يديها على ركابيها لمطوين بوضعية اليوكا مغمضه عينيها وكاتنفس شهيييق وزفير الشئ لي خلى الهدوء يسيطر على شخصيتها المرحة والمجنونة...
لمار- (كلسة حداها ) هي زين فكرتي فشي خوطة ...
لمار هي صديقتها الوفية وقالة لنورسين مكاتعرفي واااالو فلحماق إنسانة مرحة بامتياز، وكاتمتع بحس النكتة والفكاهة، وكاضيف لحياة للي من حولها متعة خاصة، ونكهة لا يمكنهم مقاومتها شعرها بني اللون وقصير حد الاكتاف وعيونها عسلين بشرتها بيضاء رشيقة وقصيرة وهي فنفس سن نورسين
لمار- هيييييي راني كانهضر معاك....
نورسين-(تنهدت بنفاد صبر) اوووف علاش غير كانبغي نرتاح كانلقاك فوق راسي...
لمار- ازبل سمعيني ياك تافقنا لبارح نفكرو فشي خوطة باش ندمو ديك باطوزة ديال المديرة
نورسين- ( تنهدت ورجعة لوضعيتها لي كانت عليها وغمضة عينيها) شهييييق زفيييير...
لمار- اشمن شهيق ولا زمر... فاش سقلاتك البارح كونت باغيا نقطع يدين ديك باطوزة مكاينش لي يسقلك من غيري كاتسمعيني
ضحكة من داخلها على سداجة صديقتها المغيارة لاكن مابغاتش تبينلها فرحة لي غمرتها لانها مفتاقدة داك الاحساس ديال الاهتمام ماشي غير هي بل كل اطفال الميتم
نورسين- (ضربتها لراسها) واسكتينا داك لسان طويل شي نهار غادي نقطعو ليك
لمار-(تألمة من الضربة)ااااه يعطيك ل.... حقيرة ...(دارت ضحكة شريرة وقالة بصوت خافة ملئ بالمكر) الى عرفتي شنو درت تموووتي غير بالضحك انتقامي منها غادي يكون عسييير غير بلاتي على ديك بطوزة مزال ماخلاقش لي يضربلي صاحبتي هاااااهاهاهاها...
نورسين-(علات حاجب واحد بطريقة مستفزة وبتاسمت ابتسامة جانبية)شنو درتي المسيميما...
لمار- والو امزيبدا غييير وصيت بوزبال يجمع ليا سراق زيت ودار معايا يجيبهوملي فلعشيا
نورسين-اويلي شنو غاديري بيه ...لمار علاياش ناوية
لمار-(بتاسمة بخبث)هههههه غادي ندمها على النهار لي فكرت فيه تقيسك انا شفتها داك نهار فاش شافت سراق زيت كانت غادي تحماق هههه
نورسين-ونتي كاتسناي بوزبال يجيبلك سراق زيت باش تلوحيه عليها ياك
لمار-(ربعت يديها وعلات حواجبها وبكل فتخار وقالت) تماااااااااما...
نورسين-لمار من الاحسن تنساي هاد التخربيق راه الى عاقت بينا غادي نمشيو فيها انا وياك والله ماترحمنا غادي تلوحنا للزنقة نيشان...
لمار-ولاكن هي راها سرفقاتك
نورسين- حتى انا قللت عليها الاحترام وعصبتها كان عليا نسمع لهضرتها لاكن قصوحية الراس كاترجع بلبرودة فلخر ...صافي انا نسيت نساي حتى نتي...
لمار-بغيت نعرف علاش ضرباتك غادي نحماق
نورسين-(حنات راسها وغمضة عينيها وفتحتهم بتعب) مابغيتش نتسخرلها وسباتلي ماما وبابا الله يرحمهم وماستحملتش وغوت عليها....
لمار-(وقفة معصبا)شفتي هادشي لاش باغيا ننتاقم من ديك لبكرة لحقيرة غير كاتسب وتعاير فينا تقول حنا لي ختارينا نعيشو ايتام
نورسين-(وقفة وطبطبت على كتف لمار) حتى شي واحد مكايختار واليديه المار حنى مكتاب لينا نعيشو هاكا انا وياك عندنا 17 لعام ....ياك حنى صحابات
لمار-لا لا لا حنى خواتات...
نورسين-(بتاسمة بطفولية) سمعيني اختي بقا لينا غير هاد العام الاخير ويسبكو علينا من هنا خصنا نقلبو على شي خدمة ونكريو شي بيت انا وياك نقراو ونخدمو بدوام جزئي شنو قلتي..
لمار-انا متافقة معاك غير نساليو الامتحانات ديال الباك ونبداو نقلبو على خدما
نورسين-صافي مشات...بلحق خالتك ماتقول والو
لمار- كون كانت هاديك خالتي كاع ماتلوحني فالخيرية وانا بنت عام ونصف مكاتهمني لاهي ولا غيرها...
نوسين-صافي ادن متافقين المسيميمة ديالي
لمار-(شافة فيها وبتاسمة بطفولية وعنقتها) حبيبتييييي اممم
نورسين-(نزاعجة من العناق)واطلقي مني كلتليك مكانحملش الاحضان ....اااااه بعدي منييي
لمار- ههههههههه غير شوية غييير شوية
نورسين-(دفعتها وهربات) انا كايعجبوني رجال ماشي لبنات هههههه
لمار-(تابعاها كاتجري) هييي نوووور غير وحداااا (وقفة كاتنهش) اوووف لحقيرة ماتسواش شنو فيها الى عنقتها واراه حتى انا كايعجبوني رجال...(ضربة رجليها مع الارض ) والله لابقات فيك امزيبدا ...مكاينش لي يهرب من احضاني
ماجد- انا مانهربش الى عنقتيني...
ماجد شاب فعمر لمار ونورسين عمرو 17 لعام وحتى هوا يتيم لاكن شكلو يعطيه اكبر من سنو طويل وزوين اسمر وعيونو عسلية وكايحماااااق على شاروخان
لمار-(ضارت تشوف وهزت حجرة) سير بحالك ابوزبال والله حتى ن....
ماجد-ماتبقايش تعيطيلي بوزبال المرض... قلتيلي نجيبلك سراق زيت وجبتولك اراي خلصيني...
لمار- (ضحكة بسخرية) عرفتي شنو سير قليهم فالزيت ودير عليهم مليحة وكويمنات وكولهم تاكل فيهم السم...(ضارت بسرعة حتى ضربت ماجد بشعرها الحريري)
ماجد-(شد فسدرو) احححح ...على قبلك المار نشرب انا لمرااار...هاهاها...(كايغني)طيري ميري ميري طيري....تيرارارارا...(شاف فالطاسة لي هاز) شنو غادي ندير بهادو...هممم نلوحها طبعا واخا تعبت باش جمعتهم ماخليت حتى قادوس ماقلبتش فيه...
دازو دوك الايام على نورسين ولمار شاقة بزاف بحيت انهم كانو كايوفقو بين الاعمال التنضيف والغسيل والاعتناء بالاطفال الصغار كونهم اكبر سنا وكدالك لحفاضة والمراجعة للامتحانات لي اصبحت على الابواب والجو ماخلاش من مضايقات المديرة ليهم مكانتش كاتحملهم ....
كان في الصباح والمساء الاعمال الشاقة وفاليل لحفاضة حتى كاينعسو وهوما شادين لكتوبة بين يديهم... دازو دوك الايام طايرا حتى جاء وقت الامتحانات التوتر والقلق اوحدا كاتصبر الثانية باش يرفعو لمعنويات لبعضياتهم....
دوزو الامتحانات وبجوجهم كانو فرحانين بانجزاتهم ومن بعد عدت ايام دكاء نورسين خلاها تجي هي الاولى على صعيد المؤسسة وكانت لمار فالرتبة الثانية.... كانو فرحانين بزاف تبادلو الاحضان ينقزو ويغوتو تعبيرا عن سعادتهم...ونضرات الحسد والغيرة كانت واضحة على اعين بعض زميلاتهم فالثانوية ...
البنت-ويلي على زهر عندهم علاش هوما ينجحو وحنا لا غادي نقتل راسي انااااا....هئ هئ هئ
البنت الثانية- هادوك غير بنات لخيرية وقدرو يتفوقو علينا حنا ..اكيد كانو كايغشو....
البنت-هئ هئ شنو ندير انا دابا بابا كان مواعدني يشريلي سيارة من نوع فيراري الى نجحت هئ هئ ضااااع حلمييي....
البنت الثانية-(عنقتها) هئ هئ هئ
لمار-سمعتيهم شنو كانو كايقولو... غادي نمشي نجرها من شعرها...لحقيرة
نورسين-(جراتها) هييي اجي لهنااا ...
لمار-خليني عليهم اختي نور
نورسين-زيدي نمشيو بحالنا عندنا امور اهم من دباز ولمعايرا....
لمار- شنو هي هاد الامور....
نورسين- النجاح ونجحنا الحمد لله والعطلة هاهي شديناها...دابا خصنا نفدو داكشي لي تافقنا عليه ...خصنا نقلبو على شي غرفة نكريوها ونقلبو على خدمة باش نصرفو على راسنا...
لمار-بصح عندك الحق...
دازو بضعة ايام ونورسين دارت لي فجهدها باش تلقى شي خدمة ...اما لمار كانت كاضور وتقلب عند سماسريا على غرفة للكراء حتى طاحت على وحدا بثمن بسيط نوعا ما وفحي شعبي بمدينة فاس القديمة.....وكدالك نورسين لقات خدمة فواحد المكتبة ودبرات على صديقتها معاها ...
بدوك لفلوس لي جمعو نورسين ولمار من التطوع فالاعمال خارج الميتم والاعمال الخيرية قتناو بعض الافرشة والاغطية والاواني المنزلية باش يقضيو علما يجمعو شوية دلفلوس لي تمكنهم من العيش بكرامة ويكملو دراستهم....
***في المكتبة***
سعيد- ايوا ازوينات فاش تساليو من هاد الصف كملو باقي صفوفة ونضفوهم مزيااان من لغبرة مكانحملش نشم ريحتها عندي حساسية منها (عطس) ااااتشييي
سعيد رجل في عمر الخمسينات شعرو شايب ولحيتو مكسية باللون الابيض ممزوجة مع الاسود متوسط القامة وعندو الكرش بشرتو بيضاء و كايعمل نضارات طبية كبيرة وفوجهو بعض التجاعيد لي كاتبين خبرتو الطويلة فالحياة لاكنو انسان لعوب وعويناتو زايغين متزوج واب لاربع بنات اولد....
سعيد-واش فهمتوني البنات...
نورسين-(بتاسمة)طبعا اسي سعيد مايكون غير خاطرك...
لمار- اكييد اسي سعيد غادي نردوها كاتشعل ينقاوة ريحة لغبرة ماضورش....
سعيد- مزيااان(عطس)ااااااتشيييي
نورسين-رحمك الله...
لمار-رحمك الله...
سعيد-احم ...يالاه طلقو راسكم...(مشا وخلاهم)
نورسين-سربي غادي نضف هاد الرفوف ونرتب لكتوبة لي فيهم...ونتي سيري للرف رقم 34 ونضفيه مزيان...
لمار-(دارتليها اشارة عسكرية) حاضر كابتن....علم وينفد
نورسين-هههههههههه هبلة.....
كمال- ( دخل للمكتبة) احم احم....
كمال هوا شاب عمرة 23 عام اسمر وعندو لحية خفيفة عويناتو فلون ضلام الليل ورموشو كثيفة مكاينش مسافة بين عيونو وحواجبو شفايفو موردين طويل جسمو رياضي وستايلو ديال الراب كاسكيط ديال الراب وسروال واسع وكدالك طريكو لي كان لابس فاللون الاسود....
كمال-(تنهد حيت مانتابهولوش ) احممم احممم ...
لمار-(دارت شافتو وهي تزعط) ...اش حب الخاطر اسيدي روايات ..قصص ..موسوعات.. مخطوطات دفاتر ...
كمال-(شاف فنورسين لي كانت فوق السلم ومشغولة فالتنضيف تنهد وقال) انا بغيت شعر لكحل ولعيون زورق...
لمار-(نتابهت فين كايشوف وعلات حاجب واحد وحطت يدها على خصرها وبليد لوخرا دفعاتو) سير سير اولدي تلعب مع لي قدك....ناعندناش هادشي لي بغيتي...
كمال-طلقي مني يالمسمومة...
لمار-انا مسمومة يال....
نورسين-(هبطت بسرعة من السلم )اشنو واقع لاش كاتغوتو...
كمال- هاد لمسمومة باغيا تجري عليا من مكتبة الواليد....
نورسين- واش نتا هوا كمال ولد سي سعيد...
كمال-(شاف فلمار بكل فتخار) هوا بشحمو ولحمو....(شافها كاتخنزر فيه) لاش كاتشوفي فيا
نورسين-مزياااان(لاحت عليه واحد المنديل موسخ) تحرك نضف من الرف 40 حتي توصل ل50 ...مالك كاتشوف فيا طلق راسك راه سي سعيد وصاني نتهلا فيك مزياااان ...
كمال-(تنهد)علاش الواليد علاااش ديما محشمني مع تيتيز واش انا يهودي...(هز لمنديل)واشوفي في نتي راني مزوق...
لمار-خخخخخخ بنادم كيف داير....
دازو ايام والوضع مستقر نورسين ولمار مازالين كايكافحو مع الخدمة ...اما كمال مكانش كايبغي يجي لمكتبة باه لاكن مع وجود لبنات ولى كايجي كل نهار وهوا لي كايلطف الجو بكلامو وحركاتو.. هوا ولمار كيف القط مع الفار و نورسين هي مولات لعقل فيهم ....ولفو بعضياتهم اولاو اصدقاء
كانو فغرفتهم ولمار كاتوجد كاسكروط ونورسين كاتقرا واحد لكتاب حتى سمعو دقان فالباب
لمار-شكون غادي يجي عندنا فهاد الوقتا هادي
نورسين-بلاتي نحل يمكن تكون مولات لكرا باغيا تنكر علينا شوية....(ناضت وحلات الباب) اشنو جاي دير نتا هنا....
كمال-(هاز ميكات بزاف فيديه) وسعي وسعي (دفعها ودخل) فبلاصة ماترحبي بيا كاديريلي تحقيق....افينك المرض اجي شدي لميكات من عند سيدك...
ضرباتو لمار بالمغرف لي كان فيديها وبدات تجري عليه وهوا يهرب منها وكايموووت بالضحك عليها
لمار-والله ونشدك حتى نحليك الراس بهاد المغرف
كمال-واهون عليكي انا نبقا بلا زواج ....قالتلي لواليدا الى ضربك شي حد بالمغرف عمرك تتزوج وانا باغي ندير لولاد حرام عليك تخرجيلي على مستقبلي....
لمار-انا غادي نخرج عليك وعلى راسي بسبابك غانولي مجرمة.....
نورسين-هههههههههههه والله الى ضحكتوني المساخط ....اجي نتا اشنو جاي دير عندنا فهاد الوقت راك عارف حنا جوج بنات اشنو يقولو علينا جيران فاش يشوفوك داخل خارج راك عارف المجتمع ديالنا كيف داير...
كمال-اه عارف ولاكن مكاتهمنيش هضرت الناس
لمار- ولاكن حنا كايهمنا....
كمال-اوووف حطولي ناكل داكشي لي جبت ونمشي بحالي....لاش كاتشوفي فيا سربي حطي لسيدك ياكل ....
لمار-(شاداها نورسين) طلقي مني انووور غادي نقتلو
كمال-هههههههههههه واسربيونييي
طيبو اتاي وحطو دوك لحليوات ولكرواسون وكلسو مجموعين على الطبلة كياكلو...
كمال-الله يعطيك الصحة اختي نورسين اتاي مشحاااار تبارك الله عليك ماشي بحال شي ناس كايعرفو غير يحلو فمهوم
لمار-(غمضت عينيها بنفاد صبر) يااااربي تصبرني...
نورسين-هههههه بصحة وراحة ....
كمال- الله يعطيك الصحة الى عرفتو شكون مات لبارح ويلي ويييلي
نورسين-شكوووون
كمال-بيلال مسكين لواليدا دارتلينا جنازة فالدار ماتاكل ماتشرب وتبكي عليه مسكين
نورسين-شكون هاد بيلال واش كانعرفوه
كمال- بلال لي فسامحيني ولد خالتي نديرة ماعرفتيهش....
لمار-ناري على اخبار عندك يالاطيييف
نورسين-هههههههههههه يعطيك ماعرفت شنو انا بقات فيا خالتي نديرة فاش بغات تقتل راسها مسكينة ماستحملتش موت ولدها بيلال....
لمار-اوووف لكلسا معاكوم شحال مملة... ناس فناس ولقرعة فمشيط راس بقاليكم غير لمسلسلات...انا شبعت بصحة وراحة...
دازت ديك اليلة زوينة ضحكو ونشطو مع هبال كمال ومامشا حتى تعشا معاهوم وفي الغد
سالاو خدمتهم وكالسين كايرتاحو علما يجي شي كليان يبيعوليه شي كتاب
لمار-(شافت كمال داخل) اشنو داكشي لي جايب معاك المبهدل.
كمال-ديها فسوق راسك المرض ماتبقايش تقوليلي لمبهدل
لمار-وحتى نتا ماتبقاش تقولي لمرض
نورسين-صافي هنيونا نتوما مايمكنش تهضرو بلاماتناكرو....
كمال- نور اجي تشوفي جبتليك بيسي بمناسبة عيد ميلادك 18 غير قبلي عليه واخا صغير
لمار-(خطفاتولو) واااااو بيسي حلمي الضائع....
كمال-(خطفولها)طلقي لهنا هدا ديال نوووور...
نورسين-(بتاسمة بطفولية) شكرا بزاااااف اخوية كمال مكانش عليك تعدب راسك....
كمال- خوك لواه جدك...
لمار-قلتي شي حاجة...
كمال- (خرج فيها عينيه) والو...... بصحة وراحة كانتمنا يعجبك
نورسين-اكيد غادي يعجبني....
______________
****في الزنزانة****
نورسين- دازو دوك الايام نقية وطاهرى فحياتي كنت كانشوف كلشي فاللون الابيض لمار وحتى كمال ضافو نكهة طيبة على حياتي... وخلاوني ننسى كااع المصائب لي دازو وانا فعمرو14 لعام كونت كانمر من ازمة نفسية خطيييرة وكانت هي بوحدها لي قدرت تخرجني من ديك القوقعة لي وضعاتني فيها الدنية ...هي بوحدها صديقتي لمار....
انا وهي كانمرو بنفس الضروف وتقريبا السبب لي خلاها تكون فالميتم هوا نفسو السبب لي خلاني نتلاح للخيرية ايضا وانا فعمري 14 لعام انا وهي فنفس السن ايتام اوليدينا متوفين لحسن الحض انا قدرت نعيش مع وليديا واحد الفترة مازالة نعقل عليهم مزيان بحالي يالاه كانو معايا و بحالي عمر الدنية خطفتهم مني اما هي امها توفات غير ولدتها و بباها مجهول امرو وماعمرو قلب عليها ولى سول فيها واش عايشة ولا ميتا.... لحد الان حياتي غادية على خطى ثابتة قدرنا نستقلو بنفوسنا ونوفرو مستلزماتنا اليومية ونعيشو بكرامتنا قرب وقت الرجوع للدراسة لاكن مع الاسف مكانش عندنا لفلوس باش نكملو انا وهي بجوج و بعد عناااء قدرت نقنع لمار انها تكمل هي وانا غادي نخدم حتى نجمع لفلوس ولعام لي موراه نتسجل فشي تكوين حيت كنت رافضة نقرا فالجامعة معرفتش علاش لاكني ماحملتهاش .... دخلت لمار وكانت وقت الفراغ كاتجي تساعدني فالمكتبة المصارف تزادو ومولات الغرفة لي كنا كارين عندها زادت علينا فالثمن ولخدمة فالمكتبة مابقاتش كافياني .... داك لبيسي لي جابلي كمال كادو فعيد ميلادي ضطريت باش نبيعو ونخلص بيه مولات الغرفة ماكانش عندي شي حل اخر كان كايعجبني بزااف وكنت كانلقى فيه المتنفس الوحيد من بعد مكانمر بيوم ملئ بالتعب والروتين وانا غاديا باش نبيعو وقاعلي واحد الموقف هوا لي غادي يقلب حياتي رئسا على عقب.....
......