فصل 9
قالتليه دوك لكلمات وخرجت ...الصدمة كانت قوية بالنسبة لأسد ماعمر شي واحد تجرئ يقوليه نصف كلمة من لي قالتلو نورسين عروق وجهو برزو وتسمعو صوت ضراسو وهوما كايتطاحنو ضم قبضة يديه بعصبية وخرج تابعها كايجري فنصف الشارع وهي غير سمعت خطواتو ضارت شافتو وبدات كاتجري باش مايشدهاش وعتها لكعب العالي وحيداتو وهزاتو فيديها وعطاتها لجرا اما هوا كان موراها وكايجري حتى لحقها وشدها من شعرها و لسقها معاه
نورسين-طلق منيييي...
أسد-(بغضب) عمر شي بنت ماتخطات حدودها معايا حتى جيتي نتي اشنيولة وسبيتيني حدا الجميع
نورسين-ماسمعنا حتى شي واحد حيت قلتهالك فودنيك غير بشوية
أسد-سمعيني نقولك الحشرات لي بحالك كاندعس عليهم بلخر ديال صباطي سمعتي
نورسين- ونتا سمعني نقولك حمار بحالك طبيعي يحكر على حشرة ضعيفة بحالي
نترت يديه وتمت غاديا لاكن هوا تلقا الصدمة التانية ناري حمار لا صافي هاد البنت سنات على موتها بيديها هههههههه ...ماقدرش يستحمل مشا كايجري لعندها وجرها من يديها ولسقها مع الحيط بقوة
أسد-(شدها من وجها بقوة وعينيه على شفايفها) فين باغيا توصلي هم واش شي حد محرشك عليا منين خرجتيلي منييين
بقات كاتحاول باش نزول ليه يديه من وجهها لاكن هوا كان قوي عليا بمرات وحاكمها مع لمحيط محاصرها من كل جيهة وطريق
نورسين- ماعمرك ماغاتعاود تشوف وجهي غير هني راسك انا عارفك غادي تجري عليا وماغانخليكش تستاغل الفرصة ديرها انا قدمت استقالتي فالصبح (كدااابة)
أسد-اهاه لاكن انا مازال باغيك وماغانجريش عليك حتى ندوز عليك العداب الاليم
نورسين-وانا مايشرفنيش نخدم مع واحد بحالك ...ااااااااه راك ضريتيني
أسد-وعلاش ماقدمتيهاليش فصبح ولا كنتي باغيا تستاغلي الفرصة باش تصيدي لكنوز وتبدلي شي بشي ام طماعة الحقيرة
نورسين-تماما شفتي هانتا عرفتي علاش بنت زوينة ومثيرة بحالي تقدر طيح ميات راجت غير بصبعي صغير والا كنتي حاكرني يااا شبلي الصغييير (الشبل هو صغير الاسد)
أسد-(زير عليها حتى غوتت) غادي نقطعلك هاد لسان طويل منين تسلطتي عليا منييين
نورسين- صافي طلقني نمشي بحاليييي
أسد-ماغاديش تمشي انا غادي نربيك الى ماعرفوش يربيوك واليديك
مارضاتش فاش جبد واليديها وماجا يكمل هضرتو حتى جمعت معاه للمنطقة الحساسة حتى طاح للارض وبدا كايتألم ويغوت ويسب اما هي بدات كاتجري وتجري ومع الضورة ديال واحد الشارع وهي تدخل فواحد الشخص حتى كانت غاطيح وشدها علات عينيها فيه وغير شافتو عنقاتو
بويكا-نورسين مالكي شنو واقعلك واش تبعك شي حد فين هوا
نورسين-(طلقة منو) انا بيخير شنو كادير نتا هنا سيفطك عابد باش تحضيني
بويكا-احم لا ...ماتفهميش غالاط غير كنت دايز من هنا بالصدفة
نورسين- اه مزيان واش ممكن توصلني لداري عافاك بلييز
بويكا - واخا نوصلك ولاكن حتى تقوليلي شنو وقاعليك
نورسين- ضربت الرئيس ديالي بركلة لحجرو
بويكا-(حط يدديه على فمو) اوووه يحسن عوانو مسكين جرا عليك
نورسين- اه جرا عليا ولد ل... قولي شنو كادير هنا فهاد الوقة وماتكدبشل
بويكا- كونت فواحد لبواط بلحق ماتقوليهاش لستيفانيا
نورسين- هههه اوكي
___________________
***في الزنزانة***
سبيتو ومرمدتو ههههه وضربتو ونتاقمة من داك المتعجرف لي ديما مشبعني اهانات بما انه اخر يوم غادي نشوف فيه كمارتو لاكني كنت غاااالطا وياريييتني ماضربتو ولا سبيتو وغاتعرفو من بعد علاش
ركبت مع بويكا وطريق كاملا وانا نسول فيه على المؤسسة وكان كايجاوبني على قد السؤال وصلني وودعتو وطلعت لدار ولقيت لمار مازالة فايقا وكاتسناني واول كلمة قالتها (على سلامة ساندريلا فين هوا الامير خليتيه كايقلب عليه) وجاوبتها بسخرية( خليتو كايتئلم وضيعتو فمستقبلو شوف واش يقدر يولد الامراء ولا صافي تقاضاولو) ضحكنا بجوج على هاد الجملة انا عارفة علاياش كانضحك لاكن لمار كاضحك حيت يحسابلها غير دعابة ولا نكتا من عندي مايحسابلهاش راه بصح ضيعتو فمستقبلو هههههههههه اااه ياربي غيير كانتفكرو كانبدا نضحك عاوناتني لمار فجميع دلحوايج وهي كاتبكي ولمسخوطة بكاتني معاها حطاتلي تعشيت انا وياها واخا كان الوقة معطل لاكن هدا هوا اخر يوم غانكلس معاها وخصني نستغلو فكل دقيقة مزالة ليا معاها ....ويعلم اللللله شنو وقاع لداك (المتملك النرجيسي ) بالنسبة للي مافهمش هاد المسطلح شنو كايعني انا نشرحو دابا ...
النرجسية بمختلف تعريفها تعني حب الذّات، والصفة العامّة لهذا المصطلح "الأنانية" حيث أنّ الانسان النرجسي يرى نفسه الأفضل في كل شيء مهما كان، ويضع الآخرين بمكانة أقل منه.
صفات الشخصية النرجسية
: عاشق لنفسه
. الثقة العالية بالنّفس
. يؤمن تماماً بأنّه فريد من نوعه ونادر
. حب الظهور ولفت الأنظار ومركز انتباه الجميع
. الاعتناء الشديد بالمظهر الخارجي
. عشق النجاح والسلطة
، ووهم النجاح كذلك
. الغيرة الشديدة
. استغلالي وانتهازي
. شديد الحساسية
. الافتقار إلى التّعاطف مع الآخرين
هاد الصفات كاملين كاينطابقو على داك المتعجرف لي سميتو أسد هدا لاش غير تسمعوني قلت( المتملك النرجيسي ) عرفوني كانهضر عليه...اووف نبدلو لموضوع مانهضروش عليه بزاف حيت كايجيبلي لخنقة وتقيا وكانمرض...😷
نعست انا ولمار حتى ودن لفجر ماخلينا ماقلنا وعاوداتلي على داك الشاب لي معاها فالجامعة السيدة مزعوووطا هههههه نعست واحد 4ساعات وفقة بكري توادعت مع لمار كانت باغيا توصلني للمطار قالك وانا نتهرب وقلتلها بلي غادي ندوز للشركة ومايصلاحش نديها معايا مافخبارهاش بلي صافي تطردت وحيدت عبئ علي سي عابد ماغايقلبش على لي يكلسلي فبلاصتي الله وحتى انا رتاحيت من وجه داك المتملك النرجيسي...شديت طاكسي لدار ستيفانيا ولقيت عابد وبويكا وركان وحتى ستيفانيا كايوضعو حقائبهم فصندوق السيارة وفهمت ان حتى هوما غايمشيو معانا ركبت معاهوم ونطالقنا للمطار ركبنا والوجهة ديالنا كانت بريطانيا بلاد بويكا وستيفانيا وقالي بلي المؤسسة كاينا تماك دازت ديك الرحلة متعبة وطويلة دخت ورضيت كاع داكشي لي فكرشي محنت ركان لي كان كالس حدايا مسكين ونعستليه على كتفو لموهيم تكرفصت عليه مارتاح مني حتى وصلنا لمطار بريطانيا سالمين والحمد لله ....
رتاحينا شوية فالمطار وكلينا ومن بعد عابد جاه اتصال وقالينا:: وقفو شيفور وصل:: ...وقفنا كاملين وتمشينا حتى للخارج ولقينا واحد الشخص تبارك الرحمان طويل وصحيح فتح لينا الباب وركبت انا الاولى وتسنيتهم يركبو لاكنهم بقاو واقفين تحنا عندي عابد وقالي ::غير سيري نتي حنا من بعد ونلحقوك::: رفضت فالاول وبالاحرا خفت حسيت براسي غادي نترما للمجهول بعد مدة قنعني عابد وركبت مع داك الشخص الضخم البنية... مدة الطريق كانت شي ساعة وستغربت انه مامشاش بينا فالمدينة خرج لواحد المنطقة فيها غير شانطي طويل وشجر مع جنب الطريق مانكدبش عليكم صراحة خفة بزاف لاكن كنت كانحاول نبين القوة والصلابة على ملامحي حتى وصلنا لواحد المكان تعبير ديالي فاش شفتو كان :::واااااااااااو::: كانت واحد البناية كبييييييرة بزاااااف بحال شي قصر وغير الدخلة ديالها كبيرة قطعنا مسافة على رجلينا بين الحدائق والطبيعة الخضراء وبرك الماء لي كايعوم فوسط منها البجع لي عمري شفتو غير فالتلفازة بقيت منباهرا بداك المنضر وفنصف الطريق حتى قربنا باش نوصلو للبوابة الرئيسية وقف هداك السائق ونعتلي بيديه وقالي بالانجليزية هاديك هي الباب ومشا بحالو ....
(الشخصيات غادي يكونو كايهضرو بالانجليزية لاكن انا غانكتب غير بالدارجة احسن)
بقيت متجمدا فمكاني ماعرفتش شنو ندير بالضبط ..مشتتة مضطربة حايرة بين المضي والتراجع كنت قريبا نفقد شجاعتي ونستسلم .كنت غارقة فبحر الاسئلة لي مالقيتش ليها اجوبة ولا اسباب كومة من الاسئلة تسللت واحدة مور لوخرا ....واش نرجع ....واش غير ننساحب ...لاكن كل جهدي غادي يمشي هاكاك وماغاديش نوصل لهدفي وحتى الى تراجعت غادي يقتلني داك المتملك النرجيسي على داكشي لي درت فيه ...لاكن واش غاتفيدني هاد المؤسسة ...او غادي غير نضيع وقتي الثمين ...واش خصني نطبق سياسة السمع والطاعة والى بادرت بالعصيان اش غايوقاع ...اشنو غادي ندير تحديدا رئيتي مشوشة بزاف ...غمضت عيني ومافتحتهم حتى اتخدت قراري وتقدمت نحو باب المؤسسة
فالباب وقفني الحارس بواحد الطلب غريب وقالي ::: حطي كل ماكاتملكي هنا مايمكنش ليك دخلي حتى تحطي كل لي معاك باستثاء حوايجك لي لابسا :::
مافهمتش شنو سبب هاد الطلب الغريب لاكن بانلي امر ومايمكنيش نعصيه
سلمتليه كولشي صاكي دلحوايج والساعة لي كانت فيدي ونضراتي الشمسية ماعرفتش علاش ماناقشتوش ولا على الاقل نسولو لاكني انصعة لطلبو بسهولة وكانه شئ عادي
دخلت ووضعت اول قدم في ارض مصيري وعلى نطاق عيشي الجديد فاش دخلت بقيت كانتجول بعيني فداك العالم الغريب لي دخلت ليه ونتابهت لواحد البنت واقفا وهازا لافة مكتوب عليها اسمي توجهت عندها باش نعرف شنو القصة مور ديك لافتة لي عليها سميتي مشيت موراها وقلتلها ( سلام واش كاتقلبي عليا) وضارت لعندي وقالت(واش نتي هي نورسين) جاوبتها اه انا هي قالتلي ( انا المرشدة ديالك هنا تبعيني) مشيت موراها ودخلاتني لواحد الغرفة ديال تغير الملابس عطاتني ملابس المؤسسة الرياضية اوراتني خزانتي الخاصة بديت كانبدل حوايجي ولبنت كانت واقفا مور الباب وفاش ساليت وصلتني لواحد الغرفة ومشات بحالها منبعد ماقالتلي غادي ترجع تجي بعد نصف ساعة يعني داك الوقت لي عندي حرة فيه ندير لي بغيت دخلت للغرفة ولقيتها غرفة مزدوجة لشخصين يعني عندي رفيقة السكني حليت الخزانة ولقيتها خاوية وستنتجت انها مازال ماوصلات وكانت الغرفة مرتبا وكل حاجة فبلاصتها يعني ماسبقش دخل ليها شي حد كلست ورتاحيت شوية وخرجت لقيت ديك البنت قدام الغرفة خرجت معاها وتوجهنا لمقهى المؤسسة وحنا كانتغداو قالتلي على قوانين المدرسة واول قاعدة قالتلي (لا وجود للماضي والتاريخ ... القاعدة الثانية شريك سكنت يعد رفيق وشريك فكل شئ واهم قاعدة كن انت وعش انت)
مشات البنت من بعد ماسالينا لغدا ودرت جولة حول المؤسسة وحفضتها مزيان باقي ساعتاين ونطلاقا مع رفيقة سكني كانت المؤسسة كبيرة بزاف وفيها حديقة كبيرة وملاعب وجناح لسكان الطلاب ومبنى دراسي من خمس طوابق وعاد مبنى الادارة والمكتبة والنوادي وسوق ومنزل نباتات زجاجي
وشريت بعض احتياجاتي اليومية لانه مابقالي والو خداولي كولشي فالباب و بالكارط لي عطاني عابد قبل مانركب مع السائق خديت لي بغيت ورجعت للغرفة نشوف شريكتي ونتعرف عليها غير فتحت الباب وكانت الصدمة الكبييييرة
__________________
نورسين- ركااااان شنو كادير وسط غرفتي
ركان- جيت نشوفك شنو درتي
نورسين- ااه مزيان كانتسمنا شريكتي فالغرفة باش تجي
ركان- صافي مكاين لاش تستناي هاهوا جا وصل هههه
نورسين- اشنو كاتقول نتا كيفاش لا مايمكننننش
ركان- اممم ممكن انا هوا شريكك
نورسين- مايمكنش نسكنو انا وياك فنفس الغرفة نتا راك ولد وانا بنت واش نسيتي
ركان-(تلاح على السرير) لا مانسيتش غادي نعيشو انا وياك هنا حتا تسالي تدريب ديالك
نورسين- (بقلق) لا مايمكنش انا غادي نمشي للادارة يشوفولي شي حل مايمكنش نسكن انا وراجل فنفس الغرفة لاااا مستحيل اولا غادي نعييط لسي عابد هوا لي غادي يحلي هاد المشكل
ركان- غييير بشوية عليك شكون قالك اصلا حنا غادي نعسو فنفس الغرفة
نورسن- يعني ماغادييش ....الللللله الحمد لله
ركان- لا راكي فهمتيني غلاط واش قلبتي فالغرفة مزيان
نورسين- اه قلبت مزيان علاش
ركان- لا مكانضنش( ناض وجبد واحد لكتاب من خزانة الكتب وتحلات باب ) هانتي هاهي غرفتكي نتي غاتنعسي لداخل وانا هنا يعني مانشوفك ماتشوفيني وحتى انا بامكتني نشد عليا غير بهاد الزر غادي ينزل صور وماغاتشوفيني ماغانشوفك
نورسين- واااااو ومالهوم على هاد التعقيدات كاملة
ركان- كايبغيو يعودو الطلاب على الحاجة الغريبة باش دائما مايصدقوش داكشي لي كايشوفو ويتوقعو المزيد فهمتي دابا
نورسين- اوووه ماعرفة مانقول والله واش حتى نتا اول مرا غادي تجي لهاد المؤسسة
ركان- انا قريت هنا وتخرجت لاكن كان ضروري نرجع باش نكون مع شريكتي ونعلمها داكشي لي تعلمت
نورسين-(بتاسمة) كانتمنا نتفاهمو
ركان- اكيد غادي نتفاهمو اشريكتي ههههه
نورسين- قالتلي المرشدة ان القاعدة الأساسية لهذه المدرسة هي «كن أنت وعش أنت»، أي تتمحور حول الفرد، لكن هنا حنايا جوج والكل هنا ثنائيات وشركاء، إذا الطريقة السليمة و الصحيحة للاستمرار هنا هو أن نكون كيانا واحدا من دابا لفوق . خصنا ننساجمو بشكل من الأشكال...
ركان-(تعوط فالكلسة) تبارك الله مكاضيعيش وقتك..
نورسين-طببعا واش حكرتيني...
ركان - لا لا ممتاااز ادن خليني نعطيك معلومات على المؤسسة ...تبنات قبل 10سنوات، وكاتصنف على أنها أشهر وأكثر مدرسة مصداقية في عالم التحري، يعني أي شخص يتخرج منها كايتعتابر محقق محترف ويتم الاعتراف بموهبته، وكايولي عندو الحق في الدخول إلى المواقع السرية والحصول على المعلومات مهما كان مستوى سريتها، لكن الى قام احد الخريجين باستعمال سلطته بشكل سلبي كايتم إنهاء فترة حياته من قبل المنضمة،
لكن التخرج ماشي بالأمر الساهل نتاسبات لهاد المدرسة خلال العشر سنوات الماضية 3500 طالب فقط، %1 منهم تخرج بعد ثلاث سنوات من الدراسة، أي ماعمرو سقط أبدا وهوما من احسن الطلاب وفي مجموع المتخرجين باحتساب النخبة %10 فقط تم تخرجهم أي 350 شخصا في عشر سنوات، كيفما كاتعرفي المدارس العادية كايصول رقم التخرج منها إلى 300 طالب سنويا بينما هاد المدرسة كايتخرجو منها 350 في عشر سنوات، كيف جاك هادشي
نورسين-واااو راااائع
ركان- هذا غير أن %20 من الطلاب المنتسبين سنويا كاينساحبون بعد شهرين أو ثلاث، وكاينين لي فقدو حياتهم هنا على ما أضن 10 أو 15 طالبا، زيد عليها المدرسة كاتعمل على تنمية القدرات بكل الأشكال حتى بأصعب التمارين والتدريبات، بلاما تهتم بإرهاق طلابها، وهي كاتسمح بالغياب وكاتقول «الذي لا يستطيع فل يهرب كالجبناء وحسب» هكذا كادوز الأمور هنا"،
____________________
في الزنزانة
بعدما سالينا الحديت على المؤسسة والقوانين كلسنا انا وياه وتعرفنا مزيان على بعضياتنا ركان شاب طيب القلب زيد عليها وسيييم وعندو ضحكا زوينا بزاف 😊ههههه تعشينا وكل واحد توجه للغرفة ديالو ونعسنا وفالصبح نضنا وفطرنا ولبسنا الزي المخصص للمؤسسة وخرجنا وتوجهنا للقسم لي غادي نتعرفو فيه على المدرسين والمدربين وعرفت من بعد ان 14 ديال المعلمين او المدربين طبعا تعرفت غير على اسمائهم اما شخصيا ماشفتهمش وقالولنا ان كل معلم غادي ندوزو معاه عدة اسابيع عاد ننتاقلو للاستاد الثاني
أستاذ الرياضة (جوني) وأستاذة الإيتيكيت واللياقة والبريستيج (ليندا )أستاذة اللغات( جينفير) وأستاذ المبارزة (كيم) أستاذ اختراق الحواسيب والأنظمة الأمنية( كريستوفر) أستاذة التدريب على الأسلحة (كارلا) استاذة الرقص (سارة) أستاذ تعليم القيادة (سفيان) استادة علم الطعام والتغدية (جوليا) استاد المسرح والتمتيل(جون) والقائمة مازالة طويلة
... توجهنا عند اول استادة فاش دخلنا عندها لقيناها هازا جوج مواس كبار فيديها ماستغربتش حيت شكل الغرفة كان بحال مطبخ فيه بلاكارات ولكيسان ولغطروا وزيد زيد ستقبلتنا كانت شابة فمقتبل شبابها وقالت لينا انها استادة الطبخ ستغربت وقلتلها
كيفاش الطبخ اش هاد الغباء اش دخل الطبخ فلقرايا وهي تغوت عليا وماخلاتليش بالهضرة وقالتلي
(الغباء هوا لي قلتيه دابا امدموزيل اووه خاصكوم شي درس متقن باش تعلمو تقدرو الاشياء على كل حال انا ماشي استادة الطبخ لاكني اختصاصية فالطبخ اما بالنسبة للتعليم عندي ليكم لي يكفيكم باش تحماقو بسبب الدراسة ماشي غير فالطبخ فقط حتى فالمخدرات والكحوليات والسموم والعقاقير وكل هدا كايدخل فتخصصي الطبخ او بعبارة اخرى علم الطعام والتغدية لي الاساس ديالو هوا الطبخ بما انكم طلعتولي الدم فاول لقاء غاتخرجو للساحة وغاتجريو حتى نمل انا
شفت فركان لي كان كايشوف فيا بنفاد صبر وعرفت انني كحلتها عتادرت منو غير بعيني وفهمني سلمنا امرنا لله وخرجنا للساحة وبدينا نجريو وهي واقفا عند راسنا جرينا لمدة 20 دقيقة لاكن مازال ماشفيناش غليلها وطلبت منا بصوتها المزعج نديرو حركات الضغط باليديه تقطعت فيا الحم بالجرا ساعتاين وهي مدوزا علينا العداب الاليم من بعد ختفات الاستادة وستغلينا الفرصة رتاحينا وكلينا وهي ترجع لينا بحال البرق وجراتنا معاها لواحد الغابة موجودة فمنطقة بعيدة بزاف على السكن والمباني الدراسة وقالت لينا
غادي نجمعو لحطب ونقطعوه باش نديرو شي حمام سخون بالطبع ماغاديش نجبركوم على الخدمة الى كنتو ماباغينش تستحمو
طبعا بعد ديك تمارة ديال الرياضة وليت حالتي بالعرق وماكرهتش شي حمام شفت فركان لي دارلي اشارة بعينيه باش نبدا نجمع معاهوم وداكشي لي درت بدينا فالخدمة وجمعنا الحطب وقطعناه وستغرق منا داكشي ساعتاين وكانت الساعة 9 دلليل دخلنا كل واحد لحمام سترخيت ورتاحيييت الحمد لله بعد يوم شاق
دازو عدت اسابيع فالمؤسسة والحياة كانت عادية صراحة ركان كان افضل شريك ماكنتش غغانلقا حسن منو كانبانو متكاملين وجهتان لعملة واحدة انسان محترم بزااف اما هاديك الاستادة حاجة خراااا اول اختبار داروه لينا هوا اختبار كشف الكدب و ماعمرني عرفت معنى التعب حتى لاقاني الله بيها مايمكنش ليا نوصف حتى مفاصلي لي عانات من الالم ماكانتش كافيا للتعبير عن التعب لي حسيت بيه فالايام الاولى مابين الاجهاد والتوتر الدهني زيد عليها جسمي المكسور لعدة قطع لاكن مع دالك ستمتعت وحسيت انني فالمكان المناسب عالم للاقوياء فقط دوزت عدت شهور مابين الميدان الرياضي والطبخ والاعشاب والسموم ماغاديش تصدقوني الى قلت ليكم انني زرت اربع جبال وعدة سهول وكتاشفنا وديان فسياق الانشطة المتعددة صيد والقنص والتجارب الكميائية والحسابات الفزيائية والمعادلات الرياضية مافارقناش الميكروسكوب والمنضار والمكبرة وعينينا خرجو معاهوم مارتاحش دماغي من التفكير وحفض المصطلحات نقولو انه مابقاش بزاف ونوليو اطباء اعشاب مبتدئين سوا سموم ام مخدرات او اعشاب طبية ديك الاستادة كانت دايرا كامل جهدها معانا داء ودواء ديك لمرا سبحان الله ههه
اصعب جزء عانينا منو هوا الحصص الرياضية والفنون القتالية كونا كانمارسوهم كل نهارر لمدة ساعتين وفكل يوم كنا كانقومو بنشاط مثلا الرقص تعلمت رقصة السالسا ورقصة الرومبا ورقصة الطانكو رقصة التشا تشا ورقصة السامبا طبعا ماشي كانتقنهم لان نزطط راسي هههههه كدالك تعلم الرماية بالمسدس كان واحد الاستاد ديال الرماية صعيب بزاف ماتعلمت نصيب الاهداف حتى كنت تعاقبت من عندو شي 20 مرا كدالك استادة لبريستيج بفضلها تعلمت بزاف دلحوايج بحال المشية لموزونة ونضبط لمشية بالطالون وتعلمت انواع وماركات الملابس الفاخرة وكيفاش نختار افضل الملابس والمكياج كدالك الكلسا وطريقة الهضرة بحال الناس الراقية تعلمت اللغة الانجليزية اوليت كانهضر بيها بطلاقا تااامة هي والفرنسية وشوية من الاسبانية وتعلمت طريقة اختراق الحواسب والانضمة الامنية اهم حاجة كانو كايخليوني نركز عليها هي حصة المسرح والتمتيل وليت ممتلة بارعة نبكي ونضحك فنفس اللحضة وتعلمت نكدب ونخلي لي كدبت عليه يصدقني و مايشكش فيا فواحد النهار مازال نعقل عليه كنت على المسرح كانادي واحد الضور قلت فيه
مهما طال الليل يا امي سيأتي الفجر...
مهما طال الضلم يا امي سيأتي الحق...
مهما طال الحصار يا امي يأتي يوم التحرر...
والى دالك الوقت يا امي سابقى كشجرة الزيتون شامخة عالية الجبين لا تركع للعدو سابقى متشبثة بأضي سأبقى صامدة يا أمي...صامدة لاخر رمق...
كملة هاد الجملة وانا نشوف الاستادة وعابد داخل وكايضحاااااك غير شفتو لحت الورقة من يدي ومشيت عندو كانجري وعنقتو توحشتو بزااف كان معايا راكان وحتى هوا ناض عندو وعنقو بحرارة كانت على ملامحو اثر الفخر والاعتزاز وعبر لينا شحال هوا مفتاخر بينا ومن المستوى لي ولصلنا ليه وحقا ماكدبش قرينا مزيان كاااع جهدي درتو وقال لينا بلي غادي ندوزو اول اختبار خارج المؤسسة فرحت بزاف حيت واخيرا غادي نخرجو من المؤسسة وفنفس الوقت خايفا من لي غادي نواجهو فهاد الاختبار المجهول ...